綜合眼科視光檢查
全面眼睛健康檢查，由註冊眼科視光師（第 I 部份）主理。整個程序約需三十分鐘，會用到光學／眼科儀器，必要時亦會用診斷藥物。
檢查包括咩？
視光師會按你嘅年齡、病歷同需要調整項目。一般綜合檢查可包括：
- 病歷查詢 — 了解眼睛同身體健康、手術史、遺傳病等，方便訂出針對性檢查同建議。
- 視力測試 — 量度中央視力解像能力，了解視力是否正常、有否弱視。
- 屈光度數檢查 — 判斷近視、遠視、散光或老花。包括客觀檢查（檢影法、電腦驗眼儀）同主觀試片，得出看得清楚又舒適嘅度數。單獨電腦驗眼數據唔足以作為處方。
- 色覺檢查 — 以色覺圖譜（一般係石氏圖譜）測試有否色弱／色盲。及早發現對學童學習同將來選科／就業有參考價值。
- 立體感測試 — 用偏光鏡同立體圖，評估雙眼協調同距離判斷能力。
- 斜視檢查 — 檢查顯性／隱性斜視（內斜或外斜）。
- 眼肌運作測試 — 評估眼球移動是否一致、平順。
- 調節功能 — 檢查晶體變焦（睇近）能力；四十歲以上尤其重要。
- 視野初步評估 — 視野收窄可能同青光眼等有關，必要時再安排詳細檢查。
- 眼壓量度 — 非接觸式量度眼壓，作青光眼初檢。
- 瞳孔反應測試
- 眼睛前部健康檢查 — 生理顯微鏡檢查結膜、角膜、晶體等（例如結膜炎、角膜血管增生、白內障）。
- 眼底健康檢查 — 檢查視網膜、視神經、血管、黃斑等；必要時會建議放瞳視網膜檢查或眼底攝影。
- 診斷及處理 — 按結果建議護理、眼鏡／隱形眼鏡驗配，或轉介其他專業人士。
