放瞳視網膜檢查
視網膜（俗稱眼底）好比相機嘅菲林——菲林出問題，再好嘅鏡頭都影唔到清楚相。放瞳檢查可以睇得更深、更廣，幫助發現視網膜、視神經同黃斑等問題。
眼睛係全身唯一可以用肉眼直接觀察血管嘅地方。透過放瞳視網膜檢查，視光師可評估視網膜、脈絡膜、視神經乳頭有否病變，例如視網膜脫落、黃斑病變、青光眼、視神經炎等；有時亦可發現高血壓、高血脂、高血糖等全身性疾病嘅線索。視神經屬中樞神經系統一部分，部分腦部問題亦可能喺眼睛反映出來。
點解要放瞳？
透過正常瞳孔，視光師大約只可以檢查到約三分一視網膜。若要更清楚睇周邊視網膜，需要用散瞳劑暫時放大瞳孔再檢查。檢查前視光師會先評估你是否適合用散瞳劑。放瞳一般需等候約 30 分鐘。
邊啲人適合／建議做？
放瞳眼底檢查冇年齡限制。以下情況特別建議：
- 突然出現飛蚊、閃光
- 懷疑有視網膜、視神經、黃斑相關問題
- 糖尿病
- 近視超過約 600 度
- 青光眼，或家族有視網膜疾病史——更需要定期檢查
重要注意（請務必閱讀）
- 散瞳劑會令瞳孔放大同睫狀肌暫時麻痺，通常約 4 至 6 小時內會畏光、睇近模糊；建議當日帶備太陽眼鏡，並避免喺 12 小時內駕駛或操作機械。
- 此檢查唔適合前房角太窄或閉角型青光眼患者。